ده‌زگای ڕۆشنبیری و بڵاوكردنه‌وه‌ی كوردی له‌ ڕۆژانی 24-25/8/1988 دا له‌ سلێمانی ڕێكی خست.

   مه‌وله‌وی ، به‌و بوزورگی یه‌وه‌ تا ئه‌م میهره‌جانه‌ (1988) بیره‌وه‌ری یه‌كی جه‌ماوه‌ریی بۆ نه‌كراوه‌ و كۆڕ و میهره‌جانی بۆ سازنه‌كراوه‌، تاوه‌كو له‌م دوایی یه‌دا ده‌زگای ڕۆشنبیری  و بڵاوكردنه‌وه‌ی كوردی هه‌ستی به‌م كه‌لێنه‌كرد و دوو لیژنه‌ی بۆ پڕكردنه‌وه‌ی و هێنانه‌دیی ئه‌م ئاواته‌ پێكهێنا . لیژنه‌ی یه‌كه‌م له‌ یه‌غدا بوو به‌ سه‌رۆكایه‌تیی مامۆستا مصلح مصطفی جه‌لالی به‌ڕێوه‌به‌ری گشتی ده‌زگا و ئه‌ندامه‌تیی مامۆستایان مصطفی نه‌ریمان و عبدالرزاق بیمار. لیژنه‌كه‌ بانگه‌وازێكی له‌ ڕۆژنامه‌ی (هاوكاری) دا بڵاوكرده‌وه‌ و چه‌ند لێكۆڵینه‌وه‌یه‌كی  گه‌یشته‌ ده‌ست و به‌ چه‌ند كۆبوونه‌وه‌یه‌ك بڕیاری له‌سه‌ر ئه‌و باس و لێكۆڵینه‌وانه‌ دا كه‌ شیاوی بڵاوكردنه‌وه‌ن. لیژنه‌ی دووه‌میش له‌م زاتانه‌ پێكهات له‌ سوله‌یمانی: 

د.عزالدین مصطفی رسول

 مصطفی نه‌ریمان

 مصطفی صالح كریم

 فریا جاف 

ئازاد محمود 

ئه‌م لیژنه‌یه‌ بڕیاری چۆنیه‌تی به‌رپاكردنی ئه‌و میهره‌جانه‌ی داو به‌رنامه‌ی بۆ دانا و سه‌رپه‌رشتیی میهره‌جانه‌كه‌ی كرد و بۆ ئه‌م مه‌به‌سته‌ له‌ مانگی ئابی 1988 دا چه‌ند جار كۆبوه‌وه‌ و ، میهره‌جانه‌كه‌ له‌ ڕۆژانی 24-25/8/1988 دا له‌ هۆڵی ڕۆشنبیریی جه‌ماوه‌ر له‌ سوله‌یمانی به‌ پێی ئه‌و به‌رنامه‌یه‌ی بۆی دانرابوو ڕێكخرا.